চৈয়দ আব্দুল মালিকৰ ১৯১৯ চনত গোলাঘাট জিলাৰ নাহৰণিত জন্ম হয়। তেওঁ অসমীয়া গল্প আৰু উপন্যাস সাহিত্যলৈ এক নতুন তৰংগ কঢ়িয়াই আনিছিল। তেওঁক "গল্পসম্ৰাট" বুলিও কোৱা হয়। তেওঁৰ একমাত্ৰ কবিতা পুথিখনৰ নাম হৈছে "বেদুইন"। তেওঁৰ কবিতাত শব্দৰ সুষম আৰু অৰ্থৱহ ব্যৱহাৰ দেখা যায়। মালিকে ৰচনা কৰা কেইবাখনো উপন্যাস বহুসমাদৃত। তাৰ ভিতৰত "সুৰুযমুখীৰ স্বপ্ন", "ৰূপতীৰ্থৰ যাত্ৰী", "ধন্য নৰতনু ভাল", আদি উল্লেখনীয়। "অঘৰী আত্মাৰ কাহিনী" নামৰ শীৰ্ষক উপন্যাসখনৰ বাবে তেওঁ সাহিত্য অকাডেমী বঁটা লাভ কৰিছিল। তেওঁৰ দ্বাৰা ৰচিত অন্য কেইখনমান গ্ৰন্থ হ'ল - "পৰশমণি", "আধাৰশিলা", "মৰহা ফুল", "স্বাক্ষৰ", "ছবিঘৰ", "ৰঙাগড়া", "ৰজনীগন্ধাৰ চকুলো" ইত্যাদি। তেওঁৰ গল্প, উপন্যাসৰ আলমত "জেতুকা পাতৰ দৰে", "মমতাজ" আদি চলচ্চিত্ৰও নিৰ্মিত হৈছে। তেওঁ ১৯৭৭ চনত অসম সাহিত্য সভাৰ অভয়াপুৰী অধিৱেশনৰ সভাপতিৰ আসনো অলংকৃত কৰিছিল। এইজনা বিখ্যাত সাহিত্যিকৰ ২০০০ চনত দেহান্তৰ ঘটে।